Համազգայինի 90-ամեակին առիթով միութիւնը շնորհաւորած եւ իրենց ողջոյնի խօսքերը յղած են Համազգայինին հետ գործակցած եւ տարբեր ձեւերով ու առիթներով անոր հետ աշխատած արուեստագէտներ, ուսուցիչներ եւ արուեստի մարզին մէջ իրենց կշիռը ունեցող անձնաւորութիւններ:
Իմ սիրելի՛ բարեկամներ, մշակութային կեանքի մարտակա՛ն ընկերներ, յետադարձ հայեացքով նայում եմ ձեր անցած կեանքին, տեսնում` ձեր յաղթահարած դժուարութիւնները, ձեր ձեռքբերումներն ու նուաճումները եւ հիացմունքով լցւում ձեր տոկունութեան, ազգասիրութեան, նուիրուածութեան հանդէպ… Աստուած թող հազարապատկի ձեր ուժն ու եռանդը… Ձեզ` Յոյս, Հաւատ, Սէր, Համբերութիւն… Յառա՛ջ` դէպի նոր խիզախումներ…
Միշտ ձեր կողքին`
ՎԱՐԴԱՆ ՊԵՏՐՈՍԵԱՆ
***
Սրտանց շնորհաւորում եմ Համազգայինի յոբելեանը:
Ցանկանում եմ իմ գործընկերներին, արուեստագէտներին ու երգիչներին` մեծ ճանապարհ Համազգայինի հետ:
ՌՈՒԲԷՆ ԱԼԹՈՒՆԵԱՆ
***
Սիրելի՛ բարեկամներ, նուիրեալներ: Համազգային հայ կրթական եւ մշակութային միութիւնը իր աւելի քան 90-ամեայ պատմութեան ընթացքում ապացուցեց, որ այն առաջին հերթին փայլուն գաղափար է` հայ ազգը պահպանելու, չձուլուելու, մարդկանց վեհ նպատակների շուրջ միաւորելու եւ ազգային արժէքներին հաւատարիմ մնալու գործում: Շնորհաւորանքներս եւ միշտ եղէք այդպէս երիտասարդ ու գործունեայ:
ՌՈՒԲԷՆ ԲԱԲԱՅԵԱՆ
***
Ամենաջերմ մաղթանքներս Համազգայինի մեծ ընտանիքին, որը սկսել եւ շարունակում է 90 տարի շարունակ, իր կարեւորագոյն ու հայանպաստ գործունէութիւնը ողջ աշխարհում: Ամէն մի հայրենիքից եկած արուեստագէտ, որոնց թւում ենք նաեւ ես եւ տիկինս, երբեք չենք մոռանայ այն տարիները, որոնք անց կացրինք Լիբանանում, ձեռք բերեցինք հաւատարիմ եւ ազնիւ ընկերներ եւ մեր գիտելիքները առաւելագոյն չափով փոխանցեցինք մատաղ սերունդին: Հպարտ ենք, որ կարող ենք մեզ էլ համարել Համազգայինի ընտանիքի անդամ: Միշտ ձեզ հետ ենք:
ՀՀ արուեստի վաստ. գործիչ`
ՎԻԳԷՆ ՍՏԵՓԱՆԵԱՆ
Կոմիտասի անուան Պետ. կոնսերվատորիայի
ԴՈՑԵՆՏ ՆԱՐԻՆԷ ՅԱՐՈՒԹԻՒՆԵԱՆ
***
Թանկագի՛ն բարեկամներ, հաճեցէք ընդունել մեր սրտագին շնորհաւորանքները եւ մաղթանքները հարազատ միութեան` ՀԱՄԱԶԳԱՅԻՆԻ հիմնադրման 90-ամեակի առթիւ: Ահաւասիկ, օտար երկնքի տակ աւելի քան 90 տարի հայ մարդու հայեցի կրթութեան, մշակութային դաստիարակութեան խնդիրը եղել եւ մնում է սերունդներին հետեւողական ծառայելը, նրա ազգային, բարոյական անբասիր նկարագրի անխաթար պահպանումը, համամարդկային բարձր արժէքներին հաղորդակից դարձնելը, յանուն Ազատ, Անկախ եւ Միացեալ Հայաստանի կերտմանը ամբողջական եւ անսակարկ նուիրումը: Հաւատարիմ մնալով Համազգայինի Ռահվիրաների պատգամներին եւ իր առաքելութեանը` ՀԱՄԱԶԳԱՅԻՆԸ այսօր եւ վաղը դարձեալ պատնէշի վրայ է իրագործելու համար բոլոր այն հրամայականները, որոնք հանդիսանում են հայ ազգային կեանքի մշակութային առաջնահերթութիւններն ու նպատակները: Մէկ անգամ եւս մեզ բոլորիս շնորհաւորելով յոբելեանի առիթով` մաղթում եմ նոր յաջողութիւններ ու ձեռքբերումներ յանուն Հայ Մշակոյթի հետագայ զարգացման եւ պանծացման:
ԵՐՈՒԱՆԴ ԵՐԿԱՆԵԱՆ եւ ԱՆՆԱ ԱՐԵՒՇԱՏԵԱՆ
***
Համազգային մշակութային միութեան 90-ամեակը մէկ անգամ եւս հաստատում է սփիւռքի անգնահատելի ներդրումը մեր մշակութային կեանքում, մասնաւորապէս` Լիբանանի Համազգայինի: Այս յիշարժան տարեթուին շնորհաւորելով բոլոր համազգայինցիներին` իմ շնորհակալութիւնն եմ յայտնում յատկապէս Լիբանանի Համազգայինին, որը երկար տարիներ ինձ հիւրընկալել եւ հնարաւորութիւն է ընձեռնել իմ արուեստը ներկայացնել Միջին Արեւելքի տարբեր քաղաքներում: Ինձ համար ոչ միայն մեծագոյն պատիւ, այլ լիցքաւորում է եղել մշակութային այդպիսի հարուստ ճանապարհ անցած կազմակերպութեան հովանաւորութիւնը վայելելը: Մաղթում եմ նորանոր 90-ամեակներ:
ԴՈԿՏ. ՄԱՐԻ ՌՈԶ ԱԲՈՒՍԷՖԵԱՆ
Սան Ֆրանսիսքօ, 8 փետրուար 2019թ.
***
Սիրելի՛ Համազգային, հպարտ եմ, որ ճակատագիրը ինձ տարիներ առաջ հնարաւորութիւն տուեց դառնալու Համազգային հզօր ընտանիքի մի փոքրիկ մասնիկը: Ընտանիք, որը հայոց մեծ աղէտից մինչ օրս կրթել ու մեծացրել է հայ ժողովրդի բարձրագոյն իտէալներին նուիրուած սերունդներ եւ հզօր անհատականութիւններ, որոնցով հպարտանում ենք ու դեռ հպարտանալու ենք յաւերժ: Սիրով եւ խոնարհումով`
ԴԱՒԻԹ ՅԱԿՈԲԵԱՆ
***
Համազգային հայ կրթական եւ մշակութային միութիւնը սփիւռքի մեր ամենալուրջ կառոյցներից մէկն է, որը կոչուած է ծառայելու աճող սերնդի հայեցի դաստիարակութեան ազգանուէր գործին:
1991 թուականից մայր հայրենիքում հաստատուելուց անմիջապէս յետոյ «Սայաթ – Նովա» մշակութային միութիւնը սկսեց արդիւնաւէտ համագործակցութիւն Համազգայինի հետ: Անչափ բարձր եմ գնահատում Համազգայինի բոլորանուէր ծառայութիւնը մեր ժողովրդին, որ տարածւում է աշխարհի բոլոր ծագերում, որտեղ հայ համայնք կայ:
90-ամեակի առթիւ շնորհաւորում եմ Համազգայինի բոլոր նուիրեալներին:
Աստուած բոլորիդ պահապան:
ԹՈՎՄԱՍ ՊՕՂՈՍԵԱՆ
«Սայաթ-Նովա» մշակութային միութեան նախագահ,
ՀՀ ժողովրդական արուեստագէտ, դոկտոր, փրոֆեսէօր
***
Խորհրդային Հայաստանի հիմնադրման հէնց առաջին տարիներին անհիմն պատճառաբանութիւններով հայրենիքից արտաքսուեցին մեծ թուով մտաւորականներ, որոնք քաջ գիտակցում էին հայապահպանման հարցում կրթութեան եւ մշակոյթի առաջնային դերը: Հիմնախնդրի լուծման նպատակով 1928 թ. Գահիրէում հիմնադրուեց Համազգային կրթական միութիւնը, որի առաքելութիւնն էր սերունդների հայեցի դաստիարակութիւնը: Շատ կարճ ժամանակաընթացքում Համազգայինը ընդարձակուելով` ճիւղաւորուեց Միջին Արեւելքում, Եւրոպայում, Ամերիկայում եւ տասնեակ այլ երկրներում:
Համազգայինի ջանքերով սփիւռքահայ գաղթօճախներում հիմնադրուեցին պարախմբեր, թատերախմբեր, երգչախմբեր, երաժշտական դպրոցներ եւ քոլեճներ, ճեմարաններ, տպարաններ, հայագիտական բարձրագոյն հաստատութիւններ, թերթեր եւ ռատիօ-հեռուստատեսային հեռարձակումներ, որոնց շնորհիւ հնարաւորութիւն ընձեռնուեց օտար ափերում, հայրենիքից հեռու կրթել եւ դաստիարակել հայ պատանիների եւ երիտասարդների մի քանի սերունդ:
Հայաստանի անկախացումից յետոյ հայրենիքում հաստատուեց Համազգայինի գրասենեակը, որը հնարաւորութիւն տուեց կրթամշակութային գործընթացում ներգրաւելու նաեւ հայրենիքից պարբերաբար հրաւիրուող գիտնականների, արուեստագէտների եւ մանկավարժների, որի արդիւնքում հայրենիք – սփիւռք կապերը նոր որակ ստացան:
Բարձր գնահատելով ու կարեւորելով Համազգային կրթական եւ մշակութային միութեան առաքելութեան անուրանալի դերն ու նշանակութիւնը սփիւռքի պատանիների եւ երիտասարդների հայեցի դաստիարակութեան եւ հայապահպանման անչափ կարեւոր գործում` ամենաջերմ շնորհաւորանքներս եմ յղում Համազգայինի յոբելեանական 90-ամեակի առթիւ:
Նորանոր յաջողութիւնների ակնկալիքով եւ լաւագոյն մաղթանքներով`
ԱՐՄԷՆ ՃԵՆՏԵՐԵՃԵԱՆ
***
Սրտանց շնորհաւորում եմ Համազգային հայ կրթական եւ մշակութային միութեան 90-ամեակի առիթով:
Ահռելի կենսափորձ ունեցող ու բազմաշերտ գործունէութիւն ծաւալող, այլեւս ազգային արժէք հանդիսացող միութիւնն այս յաւերժող է հայ ժողովրդի հետ, քանզի իր նպատակները պայմանաւորւում են մեր ազգային իղձերով:
Համազգայինը հայապահպանութեանը միտուած կրթական համապարփակ ծրագրերի հետ նաեւ մշակոյթի հովանին հանդիսացաւ` սատարելով` ստեղծագործական ու կատարողական արուեստի բազմաթիւ ներկայացուցիչների ու խմբերի, համոյթների ու նուագախմբերի:
Անկեղծօրէն հպարտ եմ, որ ժամանակի մէջ հնարաւորութիւն է տրուել իմ փոքրիկ մասն ունենալու բազմաթիւ ձեռնարկներից մի քանիսում, առնչուելու հայաշատ կենտրոնների պարարուեստով հետաքրքրուողների հետ:
Շնորհակալ եմ ինձ ու իմ արուեստակիր ընկերներին, կազմակերպութիւններին օժանդակելու համար:
Խորին յարգանք հայկական այս մեծ միութեան հիմնադիրներին, բարերարներին, նրա փառաւոր պատմութիւնը կերտած բիւրաւոր նուիրեալներին ու այսօր գործող գործուն մարդկանց, որոնց հեռահար նպատակը կրթութեան ու մշակոյթի միջոցով համահայկական ազգային շահի տեսլականի իրականացմանն է միտուած:
ՆՈՐԱՅՐ ՄԵՀՐԱԲԵԱՆ
Հայաստանի ժողովրդական արուեստագէտ,
պարուսոյց, պալետմայստեր
14 փետրուար 2019
***
Համազգայինի մեծ ընտանիք,
Կա՞յ ոեւէ մէկը, ով կարող է համառօտ բնութագրել Համազգային հայ կրթական եւ մշակութային միութիւնը…
Կա՞յ ոեւէ մէկը, ով անսխալ կարող է ներկայացնել Համազգայինի հսկայածաւալ աշխատանքը…
Կա՞յ ոեւէ մէկը, ով կարող է, կամ իրաւունք ունի որակաւորել այս հսկայ կառոյցը…
Այս հարցերի պատասխանատուները չգիտեմ, բայց կը փաստեմ այն, որ ես հիացած եմ Համազգայինի պատմութիւնով եւ ներկայով:
Ինձ համար ՀԱՄԱԶԳԱՅԻՆ-ը մի հզօր ծառ է, որ մեծ երազանքով տնկել են մտաւորական հայորդիները եւ այդ ծառը հովանի է բազմահազար մեր հայրենակիցների համար:
Կեցցեն բոլոր այն մարդիկ, ովքեր հոգ են տանում, որ այդ ծառն իր արմատից մինչեւ վերին ճիւղն ամէն օր մնայ դալար:
Յարգանք եւ խոնարհում Ձեզ:
ՎԱՐԴԱՆ ՄԿՐՏՉԵԱՆ
***
Ջերմ եւ անկեղծ շնորհաւորում եմ Համազգային հայ կրթական եւ մշակութային միութեան 90-ամեայ յոբելեանը:
Դժուար է գերագնահատել Համազգայինի դերը հայ մշակոյթը արտասահմանում ներկայացնելու հարցում: Մշտապէս ներգրաւուել են բարձրաճաշակ երաժշտախմբեր, պարախմբեր, երգչախմբեր եւ մենակատարներ, որոնք դասական եւ ազգագրական ոճերում յաւուր պատշաճի ներկայացրել են հայ մշակոյթը եւ արուեստը:
Այսօր եւս «Կոմիտասի անուան ազգային քառեակ»-ը պատրաստակամութիւն է յայտնում իր մասնակցութիւնը բերելու Համազգային հայ կրթական եւ մշակութային միութեան տօնական հանդիսութիւններին:
Սիրով`
ԷԴՈՒԱՐԴ ԹԱԴԵՒՈՍԵԱՆ
ՀՀ ժողովրդական արուեստագէտ,
պետական մրցանակի եւ միջազգային մրցոյթներու դափնեկիր,
Կոմիտասի անուան ազգային քառեակի գեղարուեստական ղեկավար, փրոֆեսէօր
19 փետրուար 2019