News & Events

Փոքրերու պատմութեան ժամ (Գանատա)

Ուրբաթ, 18 Մայիս 2018-ին տեղի ունեցաւ  Համազգայինի «Սանահին» մասնաճիւղի «Գիրքը՝ մեր ընկերը,   պատմութիւնը մեր երեւակայութիւնը»  նշանաբանով ՝ «Փոքրերու պատմութեան ժամ»-ի  աւանդական հաւաքը: Եօթը  փոքրիկներ ուշիմօրէն ունկնդրեցին Յարութ Կիւլոյեանի  ներկայացուցած պատմութիւնը՝ «Tony Ciango»-ի   «Անձրեւի Հրեշտակը»:

 

Պատմութենէն առաջ ներկաներու անսահման կարելիութիւններուն եւ իրենց երեւակայութեան տեղի տալով, բոլոր փոքրիկներրը Պատմութեան ժամի պատասխանատու՝ Մեղրի Պագարեանի ցուցմունքներուն հետեւելով   գոյնզգոյն թղթիկներով գրքոյկ կազմեցին: Ապա գրքոյկի իւրաքանչիւր էջին  վրայ իրենց գծած պատկերացումներով հեքիաթ պատմողի  իրենց անդրանիկ փորձերը կատարեցին: Պատմութեան վերնագիրը որոշելէ ետք,  իւրաքանչիւր փոքրիկ  իւրայատուկ գունագեղ  էջերու միջոցաւ ներկայացուց իր պատկերացուցած դէպքը կամ ապրումները՝ յատուկ ոճով փոխանցելով իր ստեղծագործ ոգիին արդիւնքները:  
Յետոյ բոլորը գորգին վրայ իրենց տեղերը գրաւելէ ետք, Յարութ Կիւլոյեանի շնորհիւ հետեւեցան, թէ ի՛նչպէս «Քրիսի»-ն՝ անձրեւի հրեշտակը, յաջողեցաւ ամպերէն անձրեւ տեղացնել, լիովին եւ հպարտօրէն կատարելով իրեն յանձնուած պարտականութիւնը:

Ուշադրութեամբ եւ կեդրոնացումով ունկնդրելէ ետք  Քրիսի» հրեշտակին փորձութիւնները, փոքրիկները  պատասխանեցին պատմողին հարցումներուն: Այսուհետեւ, անձրեւոտ օրերուն, «Քրիսի հրեշտակ»ին առաքելութիւնը միշտ վառ պիտի մնայ փոքրիկներուն յիշողութեան մէջ: Հանդիպումին աւարտին պատմողը իւրաքանչիւրին բաժնեց հրեշտակի զարդեղէն մը: 

Ռոզմարի Սահակեան