News & Events

Մշակութային երեկոյ Լառնաքայի մէջ

Date: 02/14/2018
Category: Եւրոպա

Շարունակելով Նիկոսիայէն զատ՝ կղզիի միւս հայաբնակ քաղաքներուն մէջ ալ գործունէութիւն ծաւալելու իր սկզբունքային քաղաքականութիւնը, Համազգայինի Կիպրոսի «Օշական» Մասնաճիւղի վարչութիւնը 20 Յունուար 2018-ին Մշակութային Երեկոյ մը կազմակերպեց Լառնաքայի մէջ, գործակցութեամբ Լառնաքայի Հայ Ակումբի վարչութեան:

Ձեռնարկը տեղի ունեցաւ Լառնաքայի «Նարեկ» վարժարանի սրահին մէջ, ուր ընկհ. Նառա Արդարեան ներկայացուց Շառլ Ազնաւուրի կեանքն ու գործը: Այս ձեռնարկը, որ մեծ խանդավառութիւն ստեղծած էր Նիկոսիոյ եւ Լիմասոլի մէջ, նոյնքան ջերմութեամբ ընկալուեցաւ նաեւ Լառնաքայի փոքրաթիւ ներկաներուն կողմէ:

Վարչութեան ատենապետ Արթօ Դաւիթեան իր բացման խօսքին մէջ բացատրեց, որ Համազգայինը պատրաստ է Նիկոսիոյ մէջ ներկայացուած ձեռնարկները կրկնելու նաեւ Լառնաքալի, Լիմասոլի եւ Պաֆոսի մէջ, որպէսզի այդ քաղաքներու փոքրաթիւ համայնքներուն մէջ ալ վառ մնայ հայ մշակոյթի կանթեղը: