News & Events

Համազգայինի «Զուարթնոց» երգչախումբը Դամասկոսի մէջ իր փայլուն համերգով եզրափակեց Սուրիական Երգչախումբերու Փառատօնը

Երգեցին ու Համատեղ երգեցողութեամբ հաւաքական աշխատանքի գեղեցկագոյն օրինակը տուին: Երգեցին ու երգի ճամբով իրենց սէրն ու հաւատարմութիւնը յայտնեցին Սուրիական Հայրենիքին: Երգեցին՝ ցոլացնելով Սուրիոյ իսկական պատկերը, որովհետեւ, փառատօնի գեղարուեստական ղեկավար Մայեսթրօ Միսաք Պաղպուտարեանի խօսքով, երգչախումբը հաւաքական աշխատանքի արդիւնք է, իսկ զանազան քաղաքներ եւ գոյներ ներկայացնող երգչախումբերու համատեղ երգեցողութիւնը Սուրիայէն ներս մշակոյթներու համակեցութիւնը կը ցոլացնէ:

Հովանաւորութեամբ Սուրիոյ Մշակոյթի Նախարարութեան, կազմակերպութեամբ «Ասատ» Մշակոյթի եւ Արուեստի Տան Ընդհանուր Խորհուրդին, մասնակցութեամբ Սուրիոյ զանազան քաղաքներէն ժամանած իննը երգչախումբերու, Շաբաթ, 25 Փետրուարէն Հինգշաբթի, 2 Մարտ 2017-ի տեւողութեան, Սուրիոյ մայրաքաղաք Դամասկոսի «Ասատ» Մշակոյթի եւ Արուեստի տան Օփերայի սրահին մէջ տեղի ունեցաւ Սուրիական Երգչախումբերու Փառատօնը:

Խումբերը մէկ շաբթուան ընթացքին հանդէս եկան առանձին համերգներով: Ապա անոնք համատեղ երգեցողութեամբ եզրափակեցին փառատօնը՝ աւելի քան 250 անդամներէ բաղկացած բազմերանգ խումբ մը կազմելով:

Համազգայինի «Զուարթնոց» երգչախումբը հայկական միակ երգչախումբն էր:

Յատկանշական էր «Զուարթնոց»ի մասնակցութիւնը այս համերգին: Խումբ, որ հակառակ Հալէպի պատերազմական դժուար պայմաններուն, շարունակեց իր գործունէութիւնը եւ հրաւիրուեցաւ Դամասկոս, որպէս 47-ամեայ վաստակ ունեցող բազմաձայն երգչախումբ:

«Զուարթնոց«ը ելոյթ ունեցաւ վերջին օրը՝ Հինգշաբթի, 2 Մարտ 2017-ի երեկոյեան ժամը 6:00-ին, խմբավարութեամբ Գայիանէ Սիմոնեան-Տէրեանի, դաշնամուրի ընկերակցութեամբ Ռուզան Պարսումեանի:

Հալէպէն Դամասկոս երկար ճամբայ կտրած «Զուարթնոց»ի անդամները թօթափեցին յոգնութիւնն ու բազմաձայն երգեցողութեամբ նախ գովերգեցին Հալէպի յաղթանակը՝ մեկնաբանելով Մաուսուիյի «Մապրուք Նասրաք», «Ռասասաք Հալապ», Էլի Շուէրի «Ռայաթէք պըլ Ալի», Զիատ Պըթրոսի «Ալ Հաքքու Սիլահի» արաբական հայրենասիրական երգերն ու Սելիմ Մասրիի «Լեմմէ Պետէ եթեսեննէ» ստեղծագործութիւնը, ապա ներկայացուցին հայկական երգարուեստէն ընտիր ստեղծագործութիւն մը՝ Թաթուլ Ալթունեանի «Հոյ Նար»ը, որմէ ետք Սետուէյի «Մոսկովեան Գիշերներ« ռուսական երգը: Համերգը եզրափակուեցաւ Մաուսուիյի «Մապրուք Նասրաք» երգով:

Համերգին ներկայ էին պետական բարձրաստիճան պաշտօնեաներ, երեսփոխան դոկտ. Նորա Արիսեան, Համազգայինի Կեդր . Վարչութեան անդամ Կարօ Մանճիկեան, Համազգայինի Սուրիոյ Շրջ. Վարչութեան ներկայացուցիչներ, դամասկահայ, տեղացի եւ օտար հանդիսատեսներ:

«Զուարթնոց»ը իր բարձրորակ երգեցողութեամբ արժանացաւ ջերմ ծափողջոյններու եւ հանդիսատեսի գնահատանքին:

Հետաքրքրական էր Փառատօնին եզրափակիչ բաժինը: Փառատօնի գեղարուեստական ղեկավար Մայեսթրօ Միսաք Պաղպուտարեան տեղացի երգչախումբերու աւելի քան 250 անդամները ի մի բերելով բաժնած էր խումբերու եւ ստեղծած աշխատանքային խմբակներ: Իւրաքանչիւր խմբակ ընտրած էր նախադասութիւն մը, որ ռիթմիկ երգեցողութեամբ նախ առանձնաբար կատարեց, ապա բոլոր խմբակները միասնաբար հնչեցուցին իրենց ընտրած ռիթմիկ նախադասութիւնները՝ ստեղծելով գեղեցիկ, միաժամանակ հնչեղ ներդաշնակութիւն մը:

Երգչախմբային երգեցողութեան այս ոճը նորութիւն մըն էր, որ մասնակից երգչախումբերուն համատեղ աշխատելու առիթ ընծայեց:

Այնուհետեւ երգչախումբերը միասնաբար երգեցին հայրենասիրական երկու երգեր՝ զանոնք նուիրելով Սուրիական Հայրենիքին:

Հանդիսութեան աւարտին, իւրաքանչիւր երգչախումբ գնահատագիրով պարգեւատրուեցաւ կազմակերպիչ մարմնին կողմէ:
Համազգայինի Սուրիոյ Շրջ. Վարչութեան ուղղուած գնահատագիրը ստանձնեց խմբավարուհի Գայիանէ Սիմոնեան-Տէրեան, որ իր կարգին Շրջ. Վարչութեան կողմէ արծաթեայ վահան մը նուիրեց Դամասկոսի Մշակոյթի եւ Արուեստի տան:

Գեղարուեստական իր արժէքին կողքին, համերգը ուղերձ մըն էր Սուրիոյ տագնապը հրահրող ու անոր պատկերը աղաւաղել փորձող բոլոր կողմերուն: Ուղերձ մը, որ կը յուշէր, թէ Սուրիան մշակոյթներու համակեցութեան եւ փոխադարձ հանդուրժողութեան երկիր է ու պիտի շարունակէ պահպանել իր դիմագիծը այսպիսի բարձրորակ ու գօտեպնդող ելոյթներով եւս:

ԳԱՆՁԱՍԱՐ

Facebook Iconfacebook like buttonYouTube Icon