News & Events

«Համագայինը գրքին ընդառաջ». հանդիպում-զրոյց Համազգայինի Հայաստանի գրասենեակում

Date: 02/22/2018
Category: Հայաստան

Ասում են՝ հանդիպումը լաւ գրքի հետ կարող է փոխել մարդու ճակատագիրը: Հենց այդ՝ լաւ գրքի հետ հանդիպման ակնկալիքով էլ գիրք նուիրելու օրուայ շրջանակներում Համազգային հայ կրթական եւ մշակութային միութեան Հայաստանի գրասենեակը 2018 Փետրուարի 20-ին կազմակերպել էր  «Համազգայինը գրքին ընդառաջ» հանդիպում-քննարկում:  

Հանդիպմանը մասնակցում էին անուանի գրողներ, գրականագէտներ, գրահրատարակիչներ, գեղանկարիչներ, մշակութասէր երիտասարդներ եւ ուսանողներ, պարզապէս համազգայնականի լաւ բարեկամներ:

Հանդիպման մեկնարկին Համազգայինի Հայաստանի գրասենեակի տնօրէն Նարէ Միքայէլեանը, ողջունելով ներկաներին, խօսեց օրուայ խորհուրդի,  հայ իրականութեան մէջ գրքի նշանակութեան եւ արժէքի մասին, այնուհետեւ  հրաւիրեց բոլոր ներկաներին իրենց գործուն մասնակցութիւնը բերել հանդիպում-քննարկմանը:

Հանդիպմանը ներկայ էր Համազգայինի «Վահէ Սէթեան» գրատարած- հրատարակչութեան, «Լիւսի Թիւթիւնճեան» ցուցասրահի տնօրէն Յակոբ Հաւաթեանը, ով անդրադարձ կատարեց Համազգայինի հրատարակչական մարմնի ստեղծման պատմական ակունքներին, երբ հեռաւոր  1931-ին Պէյրութում հաստատուած տպարանով դրուեց Համազգայինի հրատարակչական եւ գրատարածի գործունէութեան սկիզբը: Խօսելով համազգայինի հրատարակչական մարմնի վերջին տարիների ձեռքերումների մասին` պրն. Հաւաթեանը փաստեց, որ Համազգայինի  հրատարակչական մարմինը փորձում է մշտապէս իր ձեռքը պահել ոլորտի զարկերակին` ծաւալուն հրատարակչական աշխատանքի շնորհիւ հնարաւորութիւն տալով ինչպէս արեւմտահայ, այնպէս էլ արեւելահայ ստեղծագործողին հրատարակուելու եւ  իրենց ստեղծագործութիւնները գրասէր լայն շրջանակներին հասանելի դարձնելու: Խօսուեց նաեւ Սփիւռքում հրատարակչական գործունէութեան առկայ խնդիրների մասին, շեշտուեց յատկապէս այն հանգամանքը, որ հրատարակչական գործը Սփիւռքում մեծ մասամբ իրականացւում է  կրթամշակութային կառոյցների, ինչպէս նաեւ մասնաւոր հատուածի գործուն մասնակցութեան միջոցով: Յակոբ Հաւաթեանը  հանդիպմանը ներկայ իր գործընկերներին առաջարկեց  խնդիրների լուծման ճանապարհին միասնական լուծումներ փնտռել, ինչպէս նաեւ խօսեց դրանց ուղղութեամբ գործնական քայլեր իրականացնելու Համազգայինի պատրաստակամութեան մասին:

Գրականագէտ, «Անտարես» մեդիահոլդինգի գլխաւոր խմբագիր Արքմենիկ Նիկողոսեանը ողջունելով ներկաներին, խօսեց Հայաստանում  գրահրատարակչութեան վերջին տարիների ձեռքբերումների եւ առկայ խնդիրների մասին:  Շեշտելով  գրքի տպագրութեան եւ վաճառքի, գրադարանների ու գրախանութների գործունէութեան շարունակաբար բարելաւման կարեւորութիւնը` Արքմենիկ Նիկողոսեանն իր հերթին առաջարկեց այդ ուղղութեամբ Համազգայինի հետ գործակցաբար միասնական քայլեր իրականացնել, այդ թւում մասնագիտական  խորհրդակցութիւնների, քննարկումների, ինչպէս նաեւ մշակութային փոխայցելութիւնների ճանապարհով:

Զրոյցին իրենց մեկնաբանութիւններով մասնակցեցին ԳԱԱ Գրականութեան Իստիտուտի տնօրէն Վարդան Դեւրիկեանը,  Հայաստանի գրողների միութեան հրատարակչութեան տնօրէն Շանթ  Մկրտչեանը, ԵՊՀ բանասիրութեան ֆակուլտետի դեկան Արծրուն Աւագեանը,   Կրթութեան եւ գիտութեան նախարարութեան Սփիւռքի հետ կապերի բաժնի ղեկավար Կարէն Մնացականեանը, գեղանկարիչ Յաղթանակ Շահումեանը, գրականագէտ Սուսաննա Յարութիւնեանը, պոէտ Հրանտ Ալեքսանեանը  եւ այլք:

Զրոյց-քննարկմանը յաջորդեց Համազգայինի Հայաստանի գրասենեակի` Գրքի տօնին նուիրուած ֆեյսպուքեան մրցոյթի յաղթողների պարգեւատրումը: Համազգայինի բացառիկ հրատարակութիւններից  նմուշների արժանացան Գէորգ Գարդմանցի Գիւլումեանը («Հայ առասպելաբանութիւն» Սարգիս Յարութիւնեան), Նաիրա Խաչիբաբեան («Ձիւնը», Օրհան Փամուք), Անի Աւետիսեան («Ծաղկաքաղ արեւմտահայ գրականութեան» անթոլոգիա), Մարիշ Գրիգորեանը («Աւետիս Ահարոնեան» գիտաժողովի նիւթերի ժողովածու), Մարինա Օհանեսեանը («Արեւի բնակավայրը», Ս. Ղարաբաղցեան), Մարիամ Ալոյեանը ( «Իս իմ անուշի ոդիսականը», Պ. Սնապեան), Տաթեւ Աւետիսեանը («Ծաղկաքաղ սփիւռքահայ գրականութեան» անթոլոգիա):

Գրքի մասին գինու շուրջ զրոյցներով  շարունակուեց  Համազգայինի հերթական մշակութային հաւաքը, որ կազմակերպուել էր Միութեան 90 ամեակի յոբելեանական  միջոցառումների շրջանակում:

 

Համազգայինի Հայաստանի գրասենեակ

 

21 փետրուար, 2018