ՀԱՄԱԶԳԱՅԻՆԻ ՍԱՆ ՓԱՈՒԼՈՅԻ ՄԱՍՆԱՃԻՒՂ

ՀՅԴ Ահարոնեանի շրջանի Կ.Կ.-ի խորհուրդով որոշուեցաւ հիմնել Պրազիլի Համազգայինի Սան Փաուլոյի մասնաճիւղը, լեցնելու համար գեղարուեստական թէ մշակութային մարզէն ներս այն թափուր մնացած պարապութիւնը, որ տարիներէ ի վեր կը զգացուէր պրազիլահայ գաղութէն ներս: 

Համազգայինի Սան Փաուլոյի մասնաճիւղի հիմնադրութիւնը տեղի ունեցաւ Օգոստոս 9, 2005-ին եւ կազմուեցաւ առաջին վարչութիւնը: Արդէն կարճ ժամանակի մը մէջ Համազգայինին անդամակցեցան աւելի քան ութսուն անդամներ:

Մասնաճիւղին անդրանիկ նախաձեռնութիւնը եղաւ 2006-ի Մայիսի 7-ին. Արժանթինի Ժօրժ Սարգիսեան թատերախումբի ղեկավար Գալուստ Ճանսըզեանի եւ իր կողակից Տիկ. Հերմինէ Ճանսըզեանի կողմէ ներկայացուեցան «Արարատը եւ Ես» եւ «Ունայնութիւն» թատրերգութիւնները: Սոյն ձեռնարկին ներկայ գտնուեցաւ մեծ թիւով գեղարուեստասէր հասարակութիւն մը, որ տարիներէ ի վեր կարօտն ունէր նման բացառիկ ելոյթի մը: 2006-ի Օգոստոս 27-ին Համազգայինի մասնաճիւղը նշեց իր հիմնադրութեան տարեդարձը հրաւիրելով ազգային-յեղափոխական համբաւաւոր երգիչ Գառնիկ Սարգիսեանը: Նոյն տարուան նոյեմբերին մասնաճիւղը կազմակերպեց գրական երեկոյթ մը:

2007ին մասնաճիւղը կազմակերպեց փայլուն գեղարուեստական ձեռնարկ մը, նուիրուած հայազգի բանաստեղծ Եղիշէ Չարենցի ծննդեան 110-ամեակին:

Նպատակ ունենալով գաղութէն ներս աշխուժացնել աւանդական գեղարուեստը, մասնաճիւղը որոշեց թափ տալ հայ պարարուեստի տարածմանը նաեւ Սան Փաուլոյի մէջ: Արժանթինէն Պրազիլ հրաւիրուեցաւ պարուսոյց Րաֆֆի Գրիգորեանը, որ իր երկուքուկէս ամսուան կեցութեան ընթացքին կարողացաւ Համազգայինի վարչութեան նիւթական ապահովութեամբ, երկու արդիւնաւէտ աշխատանքներ տանիլ, մէկը՝ երիտասարդութեան համար յատուկ պարի դասաւանդութիւններ սարքել, ապա Հայ Ազգային Դուրեան Վարժարանէն ներս զօրացնել պարի դասաւանդութիւնը մատղաշ սերունդին համար:

Մասնաճիւղը կը գործէ հետեւեալ յանձնախումբերով՝ գրականութիւն, ընդհանուր մշակոյթ, թատրոն, լեզու, եւայլն:

Email: hamazkbr@yahoo.com.br

ADDRESS: R. DAVID IAMPOLSKI, 65. Sao Paulo. S.P. BRASIL.